Në ditën e fundit të fushatës elektorale, kryetari i Partisë Demokratike Sali Berisha iu bëri thirrje votuesve shqiptarë që jetojnë jashtë vendit se kush nuk ka mundur të votojë të vijë dhe të votojë fizikisht në Shqipëri.

Në një konferencë për mediet, kryetari i PD-së tha se “diaspora shqiptare ka qenë shpirti i kësaj fushate elektorale”.

“Thirrja ime është, cilido prej tyre, që mund të vijë të votojë më datën 11 maj, i bën një shërbim historik vendit dhe kombit të tij. 11 Maji është dita përcaktuese e të ardhmes së kombit shqiptar”, theksoi Berisha.

Berisha nënvizoi më tej se “qindra mijëra emigrantë u regjistruan për të votuar, por një çrregullim i organizuar u konstatua në dy vende me postën, e cila ka një emër autoritar, të mirë, por që shfaqi parregullsitë më të mëdha. Kjo, uroj dhe shpresoj, të mos dekurajojë, por përkundrazi, të nxisë çdo qytetar shqiptar jashtë vendit që mund të vijë këto dy ditë dhe të votojë në qendrat e votimit, do ishte një shërbim i jashtëzakonshëm, një rast unik që u jepet për t’i shërbyer vendit”.

Burimi ATSH