Kryetari i Partisë Demokratike Sali Berisha siguroi sot se kjo forcë politike do të bëjë gjithçka për të garantuar suksesin e grave, ndërsa u shpreh se në këto 12 vite gratë shqiptare u përballën me një varfëri në rritje.

Në fjalën e mbajtur gjatë konferencës ndërkombëtare “Global She: Voices of Power, Unity, and Change”, organizuar nga Lidhja Demokratike e Gruas Berisha u shpreh se objektivi ndër më madhorët i PD-së është lufta kundër murit të patriarkisë.

“Në vitin 2005, për shkak të këtij muri, diferenca në paga midis burrave dhe grave në administratën shqiptare ishte 36 për qind. Me një projekt dhe me persistim, ne e ulëm këtë diferencë në 17.8 për qind, pra e afruam shumë me diferencën mesatare në BE. Zhvilluam një seri projektesh me të cilat ne mbështesnim gratë, bizneset e tyre, pjesëmarrjen e tyre”, u shpreh Berisha.

Berisha siguroi se PD do të bëjë gjithçka për suksesin e grave, ndërsa akuzoi se “fushata e Ramës është feministe në aparencë, por mizogjene në thelb”.

Berisha premtoi se “përveç përfshirjes në të gjitha instancat e qeverisjes, do të krijohen linja të veçanta krediti për bizneset e grave”.

Sipas tij, në këto 12 vite gratë shqiptare u përballën me një varfëri në rritje.

“Është e vërtetë se Edi Rama emëroi ministre me shumicë në kabinetin e tij dhe ju e dini, unë u ngrita në parlament dhe e përgëzova me sinqeritet. Por çfarë mund të them unë pas 4 vitesh? 4 vite, në mënyrë absolute, nuk kanë shtruar një çështje të vetme në promovim, në favor, në mbrojtje të grave dhe vajzave në Shqipëri. Asnjë”, shtoi ai.

Burimi ATSH