Hani i Përparim Laçit në Pukë, është një tjetër model në agroturizëm që me punë dhe vendosmëri ka krijuar një atraksion turistik, që mirëpret turistë vendas e të huaj.

Ministrja e Bujqësisë dhe Zhvillimit Rural, Anila Denaj, ndau historinë e përparimit si shembullin e të rinjve që kanë zgjedhur të punojnë në bujqësi.

E nisur si një ëndërr familjare në 2003, kjo bujtinë sot është një histori suksesi që bashkon traditën, kulinarinë dhe turizmin malor. Ideja lindi nga babai i familjes, një nga alpinistët e parë të zonës, i cili krijoi një vend ku udhëtarët të mund të shijonin natyrën dhe produktet e freskëta vendase.

Nga ushqimet tradicionale me produkte Made in Albania nga duart e arta të fermerëve deri te eksperiencat e paharrueshme në dimër, Hani i Përparim Laçit është një destinacion që mirëpret turistë vendas e të huaj.

“Kjo bujtinë ka nisur që në vitin 2003 kur babai im ishte një nga alpinistët e parë shqiptarë që shkuan në Everest dhe solli idenë për të bërë një agrobiznes ku të punojmë të gjithë familjarisht. Ne bashkëpunojmë me fermerë të zonës të cilëve iu blejmë produkte të ndryshme bujqësore. Në këtë pikë agroturistike janë ndërtuar edhe ambiente akomodimi (dhoma hoteli) me kapacitet për 50 persona. Ndërsa kuzhina e restorantit ofron kryesisht menu me gatime tradicionale pukjane dhe produkte bio të zonës”, tregoi Përparimi.

Ai ftoi të rinjtë pukianë të kthejnë vëmendjen tek bukuritë e zonës që siç u shpreh ai “janë resurse për të zhvilluar biznese, për t’u angazhuar me punë dhe ngritur ekonominë lokale”.

Burimi ATSH