Dogana Shqiptare merr kryesimin e nënkomitetit të CEFTA-s për Doganat dhe Rregullat e Origjinës për vitin 2025.

Ky hap vjen në kuadër të Marrëveshjes së Tregtisë së Lirë të Europës Qendrore, CEFTA, të nënshkruar në Bukuresht më 19 dhjetor 2006, si dhe bazuar në vendimin e Komitetit të Përbashkët të CEFTA-s për themelimin e organeve të CEFTA-s dhe funksionimin e tyre për kryesimin e Komiteteve dhe Nënkomiteteve, ku Shqipëria është palë e kësaj marrëveshjeje.

Nënkomiteti për Doganat dhe Rregullat e Origjinës ka për detyrë të sigurojë zbatimin e thjeshtimit dhe lehtësimit të procedurave doganore në përputhje me nenin 14.4 të CEFTA-2006 dhe t’i raportojë Komitetit të Lehtësimit të Tregtisë për zbatimin në këtë drejtim.

Gjatë një vizite studimore të CEFTA-s mbajtur në Bruksel, si dhe në formatin online, Drejtoria e Përgjithshme e Doganave, nën cilësinë e kryesimit të nënkomitetit për Doganat dhe Rregullat e origjinës, prezantoi programin e Punës para kryetarëve të të gjitha strukturave të CEFTA-s.

Prioritetet e Nënkomitetit për Doganat dhe Rregullat e Origjinës në mandatin e kryesimit nga Doganat Shqiptare kanë në fokus Operatorët Ekonomikë të Autorizuar, lehtësimin e tregtisë elektronike, bashkëpunimin me organet tatimore, përmirësimin e mëtejshëm të procedurave doganore, etj.

Dogana Shqiptare dhe Sekretariati i CEFTA-s do të organizojnë një sërë takimesh, me fokus të veçantë: Nënkomitetin e 29-të për Doganat dhe Rregullat e Origjinës, i cili pritet të mbahet në prill 2025 në Tiranë; nënkomitetin e 30-të për Doganat dhe Rregullat e Origjinës, i cili pritet të mbahet në tetor 2025, po ashtu në Tiranë.

Burimi ATSH