Ministri i Drejtësisë, Ulsi Manja përsëriti sërish sot ftesën për opozitën që të votojë ndryshimet e rëna dakord mes palëve që parashikojnë mbulimin e kostos së postimit të fletës së votimit për shqiptarët jashtë vendit, si dhe lejimin e votimit të tyre edhe me një dokument biometrik shqiptar, me afat të përfunduar.

Në fjalën e tij në Kuvend, Manja tha se opozita kushtëzon votën për shpenzimet e postimit të fletëvotimeve të diasporës me lejimin e votimit me dokument identifikimi që nuk i përket shtetit shqiptar.

Sipas tij, mbajtja e dokumentit të vlefshëm të identifikimit është respekt ndaj shtetit.

Manja theksoi se asnjë shtetasi shqiptar nuk i lejohet të votojë jashtë Shqipërisë me mjet identifikimi shqiptar.

“Votoni ndryshimet! Ju nuk e keni dashur votën e diasporës. Keni shkuar dhe ju atje. Do të shkojmë deri më 11 maj,” tha Manja.

Sekretari i përgjithshëm i PD, Flamur Noka, tha se “me Kushtetutë çdo shqiptar duhet që të votojë. Çdo shtetas duhet që të votojë, sa kohë e ka emrin në gjendjen civile dhe shteti duhet që t’i krijojë kushtet për të votuar. Por, ju doni që të votojnë vetëm ata që keni në listat tuaja dhe nuk doni që të votojë e gjithë diaspora. Ju i mohoni të drejtën e votës, keni frikë”.

Manja, duke iu përgjigjur Nokës, u shpreh se të jesh shtetas shqiptar ke të drejta dhe detyrime.

“Që të jesh shtetas shqiptar ke të drejta dhe detyrime. Për të ushtruar të drejtën e votës Kodi ka përcaktuar se duhet pasaportë biometrike, ose kartë ID e vlefshme. Ju thoni që t’i jepet e drejta e votës edhe nëse kanë një dokument të vendit ku jetojnë. Po mirë, me dokument shqiptar mund të votojnë një shtetas shqiptar në botë? Jo, sepse nuk ia lejon. Po, kemi rënë dakord, kush ka një dokument identifikimi shqiptar që i ka skaduar, përgjigjja jonë ka qenë po, që mund të votojë. Ju e bllokoni, sepse ju s’e keni dashur kurrë votën e diasporës,” tha ai.

Burimi ATSH