Ministrja e Shëndetësisë dhe Mbrojtjes Sociale, Albana Koçiu zhvilloi sot një takim me drejtuesit e strukturave shëndetësore, nisur nga vlerësimi i situatës epidemiologjike në vend.

Gjatë takimit u bisedua mbi masat që po zbatohen për të përballuar situatën e gripit dhe për të garantuar mbrojtjen e shëndetit të qytetarëve.

“Vaksinimi mbetet mënyra më efikase për të parandaluar komplikacionet nga gripi”, tha Koçiu në një postim në rrjetet sociale.

Strukturat shëndetësore janë në gatishmëri duke kryer monitorimin e situatës aktuale të gripit në vend dhe vijimin e vaksinimit falas kundër gripit për grupet e rrezikuara.

Ndërkohë, po kryhet edhe ndërgjegjësimi i qytetarëve për ndjekjen e rekomandimeve për minimizimin e transmetimit dhe parandalimin e virozave të stinës si dhe përforcimi i survejancës për infeksionet respiratore në mbrojtje të shëndetit publik.

Ministrja Koçiu tha se parandalimi fillon me një veprim të thjeshtë, vaksinimin, ndërsa i bëri apel qytetarëve të kujdesen për shëndetin tuaj dhe të afërmve tuaj.

Burimi ATSH