Si pjesë e fushatës 16 ditët e aktivizimit kundër dhunës me bazë gjinore, Prezenca e OSBE-së në Shqipëri, së bashku me misionin e OSBE-së në Kosovë, organizuan dje një takim midis komunës të Dragashit dhe bashkisë së Kukësit për të nxitur shkëmbimin e informacionit dhe të përvojave për reagimet ndaj dhunës në familje brenda strukturave bashkiake.

Në takim morën pjesë kryetari i Prezencës, ambasadori Michel Tarran, kryetarja në Detyrë e Misionit të OSBE-së në Kosovë, Cornelia Taylor dhe nënkryetarja e bashkisë së Kukësit Eglita Bilali.

“Nuk ka asnjë justifikim për të mos ecur më shumë në luftën kundër dhunës me bazë gjinore. Ne duhet t’i japim përparësi sigurimit të burimeve dhe përmirësimit të bashkëpunimit midis të gjithë aktorëve të përkushtuar për mbrojtjen dhe mbështetjen e viktimave”, tha ambasadori Tarran.

“Prezenca e OSBE-së në Shqipëri është e përkushtuar të ofrojë mbështetje në luftën kundër dhunës me bazë gjinore. Së bashku, ne mund të punojmë drejt krijimit të një mjedisi më të sigurt për të gjithë”, theksoi Tarran.