Komisioni për Ekonominë dhe Financat miratoi sot projektligjin “Për mbrojtjen e të dhënave personale”.

Zëvendësministri i Drejtësisë, Klajdi Karameta tha se kjo reformë synon të krijojë një tërësi rregullash të njëtrajtshme në të gjithë Bashkimin Evropian, të përshtatura për epokën digjitale, me qëllim përmirësimin e sigurisë juridike dhe përforcimin e besimit të qytetarëve dhe të ndërmarrjeve tek tregu unik digjital.

“Qëllimi kryesor i GDPR-së është t’u japë individëve më shumë kontroll mbi të dhënat e tyre personale dhe të thjeshtojë mjedisin rregullator për biznesin ndërkombëtar dhe administratën publike, duke unifikuar rregulloren brenda Bashkimit Evropian”, tha ai.

Reforma gjithashtu përfshin edhe direktivën, që ka të bëjë me mbrojtjen e personave fizikë në lidhje me përpunimin e të dhënave personale nga autoritetet kompetente për qëllimet e parandalimit, hetimit, zbulimit dhe ndjekjes të veprave penale ose ekzekutimin e dënimeve penale dhe lëvizjen e lirë të të dhënave të tilla.

Mbrojtja e të dhënave personale është një e drejtë themelore e individit e parashikuar në nenin 35 të Kushtetutës.

(ATSH)