Drejtoria e Përgjithshme e Arkivave (DPA) ka mirëpritur në një vizitë miqësore një grup arkivistësh të filialeve të Bankës Botërore nga anekënd globit. Kjo vizitë vjen jo më larg se 4 muaj nga takimi i krerëve të arkivave nga Ballkani, Evropa dhe më gjerë.

Ndalesa e parë e turit të tyre ishte Salla e Studimit të DPA-së, ku vizitorët u njohën me benefitet e digjitalizimit të dokumenteve dhe me mënyrat e hulumtimit, që kanë bërë të mundur përftimin e shërbimit online dhe falas, kudo dhe kurdoherë.

Në vijim, vizitorët u drejtuan për në Laboratorin Qendror të Restaurimit, ku rimëkëmben jo vetëm materiale me rëndësi historike, por edhe dokumente të çfarëdoshme sipas kërkesës së qytetarëve, të depozituar në restaurim.arkiva.gov.al

Pjesë e vizitës ishte edhe Sektori i Digjitalizimit, ku arkivistët nga Evropa, Azia dhe SHBA-të dëshmuan ekranizimin e dokumenteve, me qëllimin ruajtjen e tyre sa më afatgjatë. Në përmbyllje, mundën të këqyrnin nga pranë dhe disa prej njësive arkivore të Fondit “Koleksion i Kodikëve”, një prej thesareve që strehohen në DPA.

(ATSH)