Ambasadorja e re e Republikës së Austrisë në Shqipëri, Monica Zach, zhvilloi një vizitë në Universitetin Bujqësor të Tiranës, ku u prit nga rektori i UBT-së Fatbardh Sallaku dhe stafi drejtues i UBT.

Gjatë takimit, Zach u njoh konkretisht me projektin e filluar ndërmjet UBT dhe Universitetit BOKU, Vjenë, ku UBT ka filluar implementimin e reformës më të thellë të realizuar ndonjëherë në një universitet publik në vend, me synim ndryshimin total të arkitekturës aktuale të programeve mësimore dhe kërkimit shkencor.

Dokumenti strategjik “UBT 2030” përfshin reformimin e aktivitetit të UBT, orientuar nga modeli BOKU nëpërmjet reformimit total të ofertës akademike për të ofruar programe studimi në nivelin ndërkombëtar në ciklet Bachelor, Master dhe Doktoratë në shkencat bujqësore, mjedisore dhe ato të jetës.

Në një njoftim për shtyp UBT bëri të ditur se, “kjo reformë përfshin reformimin e kërkimit shkencor, transferimin e njohurive dhe teknologjisë, digjitalizimin e procesit të mësimdhënies, mësimnxënies, kërkimit, transferimit të njohurive dhe teknologjisë si dhe menaxhimin e UBT sipas standardeve dhe modeleve më të mira ndërkombëtare”.

Reformimi synon zhvillimin e kapaciteteve humane dhe institucionale të internacionalizimit të veprimtarisë së UBT sipas modelit të BOKU dhe universiteteve homologe të vendeve të zhvilluara. Përveç kësaj, ky projekt përfshin edhe riorganizimin e thellë institucional të UBT, përkatësisht të strukturave përbërëse dhe funksionimit të tyre, kryesisht sipas përvojës së BOKU, për të modernizuar gjithë veprimtarinë e drejtimit dhe administrimit të institucionit.

Ambasadorja Zach shprehu gatishmërinë e vazhdueshme të ndihmës dhe mbështetjes së qeverisë austriake ndaj kësaj reforme, e cila konsiderohet si një ndër projektet më të rëndësishme që qeveria austriake po mbështet në Shqipëri.

(ATSH)