Ministri i Mbrojtjes, Pirro Vengu tha sot se mjekët ushtarakë janë çdo ditë në detyra të rëndësishme humanitare, duke u shërbyer jo vetëm efektivëve të Forcave të Armatosura, por edhe qytetarëve.

“Mjekët ushtarakë kryejnë detyra të jashtëzakonshme humanitare çdo ditë, duke u shërbyer jo vetëm efektivëve të Forcave të Armatosura, por edhe çdo qytetari që kërkon ndihmë mjekësore. Ata nuk kufizohen vetëm në ambientet e Spitalit të Traumës apo brenda kufijve të vendit, por janë gjithmonë gati të përgjigjen kudo nevojitet ndihma e tyre”, u shpreh ministri në postimin e tij në Facebook.

Disa histori suksesi dhe angazhimeve të mjekëve ushtarakë, sillen në vëmendje në postimin e ministrin të Mbrojtjes, duke kujtuar rolin e mjekëve, që përtej humanizimit, nuk bëjnë dallime në shërbimet e tyre, nëse u vijnë në ndihmë ushtarakëve apo civilëve.

Brikena Danaj, mjeke ORL e nis fjalën e saj me moton: “Shëndet për të gjithë”!

“Mjekët ushtarakë edhe në bazë të përgatitjes, pasi kanë mbaruar Akademinë Ushtarake, bëjnë më tepër sakrifica. Ata shërbejnë brenda vendit, jashtë vendit dhe në terrene shumë më të vështira, në kushte nga më të ndryshmet. Gjej rastin të flas për shërbimet humanitare që ne kryejmë në rang kombëtar dhe ndërkombëtar, sipas nevojave që na paraqiten dhe kërkesave nga Ministria e Mbrojtjes”, thotë mjeku Arnold Pasho.

“Pavarësisht se ne prioritet u japim ushtarakëve, ne edhe popullatën civile e ndihmojnë në të njëjtën formë dhe me të njëjtin angazhim. Nëse në një sallë operatore, mund të jetë duke u kryer një ndërhyrje kirurgjikale, pavarësisht nëse në kartelë është shkruar civil apo status ushtarak, për mua nuk ka rëndësi puna e mjekut është një mision dhe si i tillë unë dua ta përmbush 100%”, thonë mjeket Rudina Delialliasi dhe Mariola Josifi. (ATSH)