Një cikël i ri bashkëpunimesh do të nisë për të mbështetur mbi 27 mijë të rinj, përmes programeve të dedikuara për ta në të gjithë Shqipërinë.

Ministrja e Shtetit për Rininë dhe Fëmijët, Bora Muzhaqi tha sot se të rinjtë do të mbështeten nëpërmjet 26 projekteve në kuadër të Thirrjes IV për Organizatat Rinore dhe/ose Organizatat për të Rinjtë dhe AKR-së duke shprehur gatishmërinë për të mbështetur fuqizimin e të rinjve.

Projektet kanë në fokus nxitjen e pjesëmarrjes së të rinjve në proceset vendimmarrëse dhe mbështetja e aktivizimit shoqëror dhe qytetar të tyre. Nxitjen e punëve të denja dhe ndërlidhjes së të rinjve me tregun e punës dhe mbështetjen e mirëqenies aktive, të shëndetshme, fizike, sociale, kulturore dhe mendore e të rinjve.

Ky është viti i katërt që u hap për projektpropozime nga organizatat rinore dhe/ose për të rinjtë, qëllimet e të cilave janë në përputhje me Strategjinë Kombëtare të Rinisë 2022-2029 për fuqizimin e të rinjve në çdo qytet të Shqipërisë.

Në thirrjen e parë u shpallën fituese 12 projekte nga organizatat dhe 4 nga bashkitë, shtrirja e të cilave nuk ishte në shumë zona të Shqipërisë, por në thirrjen e dytë që u përditësua me anë të metodologjisë “LOD” u shpallën fituese u shpallën 24 projekte nga organizatat dhe 5 projekte nga bashkitë. Në thirrjen e tretë u shpallën fituese 23 projekte nga organizatat rinore, ndërsa këtë vit 26 projekte.

Misioni i Agjencisë Kombëtare të Rinisë është garantimi i mbrojtjes dhe i promovimit të të drejtave të të rinjve, nëpërmjet mbështetjes për edukim joformal, ndërveprimit e aktivizimit të rinisë dhe financimit të veprimtarive rinore, në zbatim të politikave shtetërore në fushën e rinisë.

(ATSH)