Presidenti iranian Ebrahim Raisi dhe ministri i Jashtëm Hossein Amirabdollahian ishin në mesin e nëntë personave që humbën jetën kur helikopteri i tyre u rrëzua në malet veriperëndimore të vendit gjatë motit të keq, njoftuan sot mediat shtetërore.
“Kabineti iranian thirri një mbledhje të dytë urgjente në më pak se 24 orë pas konfirmimit të vdekjeve”, raportuan gjithashtu mediat iraniane.
Zëvendëspresidenti Mohammad Mokhber kishte kryesuar tashmë një takim dje në mbrëmje pasi helikopteri u zhduk mbi provincën e Azerbajxhanit Lindor. Të nëntë personat në bord vdiqën.
Sipas protokollit, me vdekjen e Raisit, Mokhber duhet të bëhet president i përkohshëm, në pritje të miratimit nga Udhëheqësi Suprem Ayatollah Ali Khamenei. Zgjedhjet e reja më pas do të duhet të zhvillohen brenda 50 ditëve.
Agjencia shtetërore e lajmeve IRNA publikoi sot imazhe të marra nga një dron që tregon mbeturinat nga një avion i djegur në një shpat të pjerrët në mes të pyllit.
Raisi dhe Amirabdollahian po ktheheshin nga një takim me presidentin e Azerbajxhanit fqinj, Ilham Aliyev, kur helikopteri i tyre u zhduk nga radarët në mjegull të dendur dje pasdite. Iranianët ndihmuan në inaugurimin e një dige në Azerbajxhan që u ndërtua bashkërisht nga palët.
