Dita e Evropës, e cila mbahet çdo vit më 9 maj, feston paqen dhe unitetin në Evropë. Kjo datë shënon përvjetorin e deklaratës historike në të cilën ish ministri i jashtëm francez, Robert Schuman parashtroi idenë e një forme të re bashkëpunimi politik në Evropë, që do ta bënte të pamendueshme luftën midis kombeve evropiane.

Propozimi i Schuman-it konsiderohet certifikata e lindjes së asaj që sot është Bashkimi Evropian. Deklarata e tij u prezantua në vitin 1950.

Pas Luftës së Dytë Botërore, një grup politikanësh evropianë parashikuan një Evropë të bashkuar për të parandaluar konfliktet e ardhshme. Deklarata e Schuman-it, e udhëhequr nga ministri i Jashtëm francez Robert Schuman, përvijoi një vizion të guximshëm të bashkimit të burimeve strategjike, veçanërisht qymyrit dhe çelikut, për të penguar luftën midis kombeve.

Në vitin 1951, pas Deklaratës së Shumanit, Traktati për themelimin e Komunitetit Evropian të Qymyrit dhe Çelikut shënoi një moment historik. Nënshkruar nga gjashtë vende (Franca, Gjermania Perëndimore, Italia, Holanda, Belgjika dhe Luksemburgu), ai hodhi themelet për integrimin e sotëm evropian dhe çoi në krijimin e një komuniteti ekonomik që gradualisht do të shndërrohej në një bashkim politik.

Në deklaratë, Schuman tha: “Evropa nuk do të bëhet menjëherë, ose sipas një plani të vetëm. Ajo do të ndërtohet përmes arritjeve konkrete, të cilat së pari krijojnë një solidaritet de fakto”.

Në faqen zyrtare te BE thuhet se, ndërsa kremtojmë Ditën e Evropës në 2024, kujtojmë udhëtimin nga shkatërrimi i pasluftës në një bashkim paqeje dhe prosperiteti. Parimet e mishëruara në deklaratën e Schuman vazhdojnë të udhëheqin BE-në, duke frymëzuar një kontinent të bashkuar në diversitetin e tij.

(ATSH_