Lufta ndaj krimit të organizuar dhe vetëpastrimi i Policisë së Shtetit ishte në qendër të diskutimeve mes ministrit të Brendshëm Taulant Balla dhe drejtorit të përgjithshëm të Agjencisë Kombëtare kundër Krimit (National Crime Agency) të Britanisë së Madhe, Graeme Biggar.

Përmes një reagimi në rrjetet sociale, ministri Balla ka publikuar foto dhe detaje i zhvilluar të enjten në Tiranë.

“Me Drejtorin e Përgjithshëm të Agjencisë Kombëtare kundër Krimit (National Crime Agency) Graeme Biggar për operacionet e përbashkëta në luftën kundër krimit të organizuar, mbështetjen teknike/ekspertizën për Policinë e Shtetit dhe vetëpastrimin e saj”, njofton Balla.

Vetëpastrimi në Policinë e Shtetit është një nga zotimet kryesore të ligjëruara nga ministri Balla, që prej marrjes së detyrës në krye dikasterit të rendit dhe sigurisë, si një nga instrumentet për të rritur efikasitetin e organizatës së Policisë së Shtetit në luftën ndaj krimit të organizuar.

NCA ka më shumë se 5000 oficerë me role të ndryshme për të mbrojtur publikun nga krimi i rëndë dhe i organizuar. Selia e NCA-së është në Londër, me qendra kryesore në Bristol, Birmingam dhe Uarrington, si dhe zyra rajonale në të gjithë Mbretërinë e Bashkuar. Po ashtu për të kryer misionin e saj, NCA ka shtrirë marrëdhëniet e saj në të gjithë botën me ekipe dhe oficerë të bazuar në më shumë se 40 vende.

(Marrë nga ATSH)