Gjendja aktuale të përfshirjes së organizatave të shoqërisë civile të Ballkanit Perëndimor në projektet kryesore të Planit Ekonomik dhe të Investimeve (PEI) ishte në fokus të takimit që zhvilloi Instituti për Bashkëpunim dhe Zhvillim (CDI) në partneritet me Sekretariatin e Përhershëm të Komunitetit të Transportit (TCT).

“Për herë të parë, ne kemi një pasqyrë të plotë të institucioneve kombëtare, rajonale dhe ato të bazuara në BE, të përfshira në menaxhimin e ciklit të projekteve të infrastrukturës. Kjo pasqyrë bazohet tek të dhënat e studimit rajonal “Aktorët institucionalë, mekanizmat dhe angazhimi i OShC-ve në PEI”, tha drejtori i Kërkimeve në CDI, Ardian Hackaj.

“Kjo matricë bashkon të gjitha hapat e projektit, që nga identifikimi i tij e deri tek auditi, së bashku me institucionet përgjegjëse. Kjo na lejon të identifikojmë pikat se ku mund të hyjnë/përfshihen organizatat e shoqërisë civile dhe palët e tjera të interesuara, në momentin e duhur dhe përmes mekanizmit të duhur”, shtoi ai.

Gjatë fjalës së tij, kryetari i Komisionit për Ekonominë dhe Financat në Parlamentin e Shqipërisë, Eduard Shalsi u përqendrua në rolin që shoqëria civile duhet të ketë veçanërisht në lidhje me shqyrtimin postlegjislativ.

“Ne duhet të strukturojmë konsultimin me OSHC-të para miratimit të ligjeve dhe të ndërtojmë një instrument për shqyrtimin postlegjislativ si praktikë për mbikëqyrjen e zbatimit dhe vlerësimit të ndikimit të ligjeve. Kjo është me rëndësi parësore për mirëfunksionimin e komisioneve parlamentare dhe të parlamentit në përgjithësi”, deklaroi ai.

Duke vlerësuar përpjekjet e ndërsjella të bëra nga aktorë të ndryshëm në nivel kombëtar, zëvendësministrja e Infrastrukturës dhe Energjisë, Enkelejda Muçaj deklaroi se, “ne duhet të përmirësojmë mënyrën se si komunikojmë në mënyrë që informacioni i disponueshëm nëpërmjet faqeve të ndryshme të qeverisë të gjejë rrugën e tij tek aktorët socialë të interesuar. Por mbi të gjitha, ne duhet të ndërtojmë dhe ruajmë besim”.

Sekretariatit i TCT-së riafirmoi angazhimin për të përmirësuar zbatimin e projekteve kryesore të transportit në kuadër të Planit Ekonomik dhe të Investimeve në Ballkanin Perëndimor.

Në emër të drejtorit të Sekretariatit të TCT-së, Matej Zakonjšek, Martina Hakl, nënvizoi rëndësinë e gjithëpërfshirjes në zbatimin e projekteve. “Projekti ‘Connected WE Can’ nxit dialogun dhe siguron një zbatim më gjithëpërfshirës dhe më me ndikim të Planit Ekonomik dhe të Investimeve për tranzicion të qëndrueshëm dhe të gjelbër në sektorin e transportit. Komuniteti i Transportit do të vazhdojë të angazhohet aktivisht me shoqërinë civile në fushën e transportit, duke vlerësuar njohuritë dhe kontributet e tyre”.

(Marrë nga ATSH)