Instituti i Statistikave (INSTAT) bën të ditur se Censi i Popullsisë dhe Banesave, i cili ka filluar në datën 18 shtator 2023, po ecën sipas parashikimeve.

Sipas INSTAT-it, asnjë problematikë thelbësore nuk është shfaqur gjatë këtyre ditëve dhe angazhimi i INSTAT është maksimal për t’i garantuar çdo qytetari në Republikën e Shqipërisë të drejtën për t’u numëruar.

Nga informacionet paraprake në terren, sipas INSTAT-it, qytetarët i janë përgjigjur pozitivisht thirrjes për të marrë pjesë në Cens në të gjithë territorin e Shqipërisë.

Drejtoresha e Përgjithshme e INSTAT-it, Elsa Dhuli, përmes një deklarate për shtyp informoi se thekson se INSTAT ka angazhuar dhe punonjësit e shërbimit civil për të monitoruar dhe dhënë zgjidhje problematikave potenciale që mund të hasen.

“Deri më tani nuk kemi hasur në asnjë problematikë apo ankesë të qenësishme për mbledhjen e të dhënave në terren. INSTAT përveç stafit të angazhuar për mbledhjen e informacionit në terren (anketues, kontrollorë dhe mbikqyrës) ka angazhuar dhe punonjësit e shërbimit civil të INSTAT për të monitoruar dhe dhënë zgjidhje problematikave potenciale në një proces statistikor kaq kompleks siç është Censi i Popullsisë dhe Banesave. Dua të theksoj që ky është një proces totalisht teknik dhe informacioni i mbledhur nga të gjithë familjet shqiptare është konfidencial dhe i garantuar nga ligji “Për statistikat zyrtare” dhe ligji i “Censit të Popullsisë dhe Banesave”, u shpreh Dhuli.

Kësisoj, ajo solli në vëmendje se është detyrim ligjor për t’ju përgjigjur anketuesve të INSTAT-it dhe sigurisht një e drejtë qytetare për të kontribuar në zhvillimin e vendit duke marrë reforma dhe politika bazuar në shifra të sakta.

“Çdo pretendim apo ankesë e çdo qytetari të cilit mund t’i jetë cenuar e drejta për t’u numëruar apo përgjigjur pyetjeve sensitive mbi etninë, fenë dhe gjuhën amtare mund të kontaktojnë në numrin jeshil të vendosur nga INSTAT (0800 22 44) ku deri tani ju informojmë se nuk ka pasur ankesa të tilla nga qytetarët. Është e mirëpritur çdo ankesë konkrete nga çdo individ, por insinuatat dhe akuzat në ajër nuk e ndihmojnë procesin”, deklaroi Dhuli.

Marrë nga ATSH