Nga BUJAR QESJA, “Mjeshtër i Madh”

Kolegia ime, gazetarja me përvojë, profesionalisht gjithnjë në rritje, nga fisi me emër i Ballhysëve, e angazhuar në vite në disa media televizive, e tash e vendosur në pozicionin parësor, të portalit të njohur vendas “DurrësLajm” Mila Ballhysa, ka realizuar shumë intervista në praktikën e saj të punës.

Por kjo me mësuesen e njohur, që i kaloi gjysmë shekulli në arsim Elsa Ekonomi, mbetet nga më të veçantat, nga më tërheqëset. Është e premte, 15 shtator 2023. Në teatrin ” A. Moisiu”, në tempullin e vetëm kulturor të Durrësit, është dhënë premiera e filmit dokumentar : “Elsa Ekonomi 50 vite në arsim”.
Dhe intervista e Ballhysës pikërisht, i mëshonte këtij evenimenti të rëndësishëm, jo vetëm për zysh Elsën, por edhe për arsimin në Durrës dhe më tej.

Suksese! Shumë arritje! Shumë punë dhe mund! Ngarkesa të pazakonta! Vështirësi sa të duash. Këto ka kaluar dhe ka ndjerë në 50 vite arsim ELSA EKONOMI HILA. “Shqiponja” e Mihal Ekknomit, fluturoi shumë lart në qiellin e kaltër të mirësisë dhe bukurisë shpirtërore, të një zonje të rrallë dhe me aftësi mbase edhe unikale, për cilësitë që bart të arsimit në Durrës.

ELSA EKONOMI, është spala e orkestrës gjigande të arsimit, melodia e së cilës, vazhdon të ndjehet po aq e ëmbël, po aq e bukur, po aq tërheqëse sa edhe më parë.

Dhe këtë melodi, të kësaj 50 vjeçareje në arsim, e pati për fat, e pati si një tregues të epërm të karrierës së saj, kolegia dhe mikesha ime e respektuar Mila Ballhysa, për ta vendosur si muzikë të përkryer, në ballinën publikuese të portalit tonë aq të dashur ” DurrësLajm”.

Një binom që e bën më të rëndë lapsin tim, më të përqëndruar e sigurisht më nderues, kur vendos në majën e tij pamjen e mrekullueshme, ku paraqitet gazetaria Mila Ballhysa, në intervistën me personaliteten e arsimit, të bijën e “mbretit” të mësimdhënies kombëtare, të të madhit, të të pashuarit MIHAL EKONOMI – Elsa Ekonomi Hila.

” 50 vite në arsim” të Elsa Ekonomit. “DurrësLajm”, si zakonisht e vetmja media e shkruar dhe në video, që nuk len të rrëshkasë në humbëtirën e heshtjes , nga eventet më të spikatura të arsimit durrsak në vite.

Kujtojmë, që është dhënë premiera e filmit dokumentar, kushtuar 50 viteve në arsim të Elsa Ekonomit, e vendosur me meritë në llozhën qendrore të mësimdhënies dhe kulturës arsimore në Durrës.

Bujar Qesja
Durrës: 17 shtator 2023