Vetëm gjatë 7 muajve të parë të 2023, 3305 qytetarë në nevojë kanë përfituar ndihmë juridike falas në më shumë se 36 komunitete rurale, urbane dhe suburbane në rajonet e Shkodrës, Lezhës, Kukësit, Peshkopisë, Elbasanit, Durrësit, Beratit, Fierit, Vlorës, Gjirokastrës, Pogradecit dhe Korçës.

Nëse keni nevojë për ndihmë juridike, drejtohuni pranë Qendrave të Shërbimit Juridik Parësor Falas në:

– Kukës: Rruga “Eksod 99”, Godina e Gjykatës së Rrethit Gjyqësor, Kati i parë
– Berat: Rruga “Antipatrea”, brenda ambienteve të Bashkisë
– Dibër: Rruga “Tercilio Kardinali” pranë Gjykatës së Rrethit Gjyqësor
– Vlorë: Sheshi: 4 Heronjtë, brenda ambienteve të bashkisë
– Korçë: Ish-Gjykata e Apelit, Bulevardi “Fan Noli”, 55
– Pogradec: Bulevardi “Rreshit Çollaku”, Lagja 2, brenda ambienteve të Bibliotekës “Mitrush Kuteli”
– Gjirokastër: Bulevardi “18 Shtatori”, brenda ambienteve të Pallatit të Sportit
– Shkodër: Rruga “Don Bosko” në ambientet e Gjykatës së Rrethit Gjyqësor
– Lezhë: Lagjja “Skënderbeg”, Sheshi “Gjergj Kastrioti” pranë Bashkisë
– Fier: Rruga “Ramiz Aranitasi”, në ambientet e Këshillit të Qarkut
– Durrës: Lagjja Nr.2, Rruga: “Aleksandër Goga” në Gjykatën e Rrethit Gjyqësor
– Elbasan: Rruga “28 Nëntori” në ambientet e Gjykatës së Rrethit Gjyqësor

Përmes mbështetjes së Projektit “Zgjerimi i shërbimeve juridike falas për gratë dhe burrat në Shqipëri”– EFLAS që zbatohet nga UNDP në Shqipëri në partneritet me Ministrinë e Drejtësisë me mbështetje financiare të Bashkëpunimit Austriak për Zhvillim, 24 juristë të 12 qendrave të shërbimit të ndihmës juridike falas, pjesë e Drejtorisë së Ndihmës Juridike Falas, dhe 16 organizata të shoqërisë civile po ofrojnë shërbime të ndihmës juridike falas.

Shërbimet juridike përfshijnë këshillim, orientim ligjor për ata që përballen me diskriminimin, mbështetje ndaj viktimave të dhunës në familje dhe dhunës me bazë gjinore, mbështetje ndaj personave me aftësi të kufizuar, anëtarëve të komunitetit Rom dhe Egjiptian, ofrimin e këshillave ligjore për çështjet e pensionit, pronave, dhe më shumë. Ne besojmë se të gjithë meritojnë akses të barabartë në drejtësi dhe UNDP është e përkushtuar të mbështesë qytetarët që nuk mund të përballojnë shërbimet ligjore të kenë një zë në sistemin e drejtësisë.

UNDP bashkëpunon ngushtësisht me Ministrinë e Drejtësisë, gjykatat e rretheve gjyqësore, bashkitë, shoqërinë civile, Avokatin e Popullit, Komisionerin për Mbrojtjen nga Diskriminimi dhe partnerë të tjerë të komunitetit.