Certifikatë mirënjohjeje shefes së Zyrës së Sigurisë Rajonale në ambasadën amerikane
Drejtori i përgjithshëm i Policisë së Shtetit, Drejtues Madhor Muhamet Rrumbullaku i dorëzoi certifikatën “Për Shërbime të Dalluara” shefes së Zyrës së Sigurisë Rajonale në Ambasadën e SHBA-së në Shqipëri, Karen Riley, me rastin e përfundimit të misionit të saj si drejtuese e kësaj zyre.
Drejtori i përgjithshëm i Policisë së Shtetit, Drejtues Madhor Muhamet Rrumbullaku i dorëzoi certifikatën “Për Shërbime të Dalluara” shefes së Zyrës së Sigurisë Rajonale në Ambasadën e SHBA-së në Shqipëri, Karen Riley, me rastin e përfundimit të misionit të saj si drejtuese e kësaj zyre.
Gjatë ceremonisë së zhvilluar në ambientet e Drejtorisë së Përgjithshme, në prani të drejtuesve të lartë të Policisë së Shtetit, drejtori i përgjithshëm i dorëzoi Riley-t certifikatën “Për shërbime të dalluara” me motivacionin “Për kontribut të jashtëzakonshëm në forcimin e bashkëpunimit ndërmjet agjencive ligjzbatuese të Shqipërisë dhe të SHBA-së, në luftën e përbashkët kundër krimit të organizuar, terrorizmit dhe trafiqeve të paligjshme, në forcimin e kapaciteteve profesionale dhe logjistike të Policisë së Shtetit shqiptar, si dhe në nxitjen dhe fuqizimin e bashkëpunimit ndërmjet agjencive ligjzbatuese të Shqipërisë dhe të vendeve të rajonit, në interes të forcimit të sigurisë publike”.
Gjatë fjalës së tij, drejtori i Përgjithshëm theksoi se Policia e Shtetit është e angazhuar dhe e fokusuar maksimalisht në forcimin e bashkëpunimit me aleatët strategjikë dhe me të gjithë partnerët kudo në botë, pasi krimi nuk njeh kufij dhe në këtë kontekst as bashkëpunimi nuk duhet të njohë kufij apo barriera.
Riley shprehu mirënjohjen e saj, për certifikatën dhe për bashkëpunimin e ngushtë me Policinë e Shtetit shqiptar. /ATSH