Boshnjakët kanë ardhur në Shqipëri në vitin 1865. Ata janë me origjinë nga Mostari dhe rrethinat e tij.

Ata ishin nisur për në Turqi në kërkim të një jete më të mirë, por si pasojë e një defekti që pësoi anija ata ndaluan në portin e Durrësit, dhe një nënpunës i perandorisë osmane me origjinë boshnjake u tha që jetën e mirë që kërkonin mund ta bënin edhe në Shqipëri.

Ata u vendosën në qytetin e Shijakut, në disa toka që blenë nga beu i qytetit dhe themeluan tre fshatra: Borak, Stari Borak dhe Koxhas. Edhe sot pjesa më e madhe e popullsisë boshnjake është e përqëndruar në këto tre fshatra, por vlen të përmendet që nuk ka qytet në Shqipëri që nuk ka boshnjakë.

Fakti që janë njerëz paqësorë, të dashur, të hareshëm dhe shumë punëtorë bëri që ata të fitojnë shumë shpejt respektin e banorëve vendas dhe të integrohen shumë mirë në shoqërinë shqiptare.

Komuniteti boshnjak në Shqipëri ka nxjerrë figura të shquara që kanë dhënë kontribut të madh në fushën e arsimit, bujqësisë (boshnjakët qenë të parët që kultivuan në vendin tonë kulturat bujqësore të patates dhe domates dhe lulen e zambakut), artit, kulturës dhe biznesit, si në qytetin e Shijakut por edhe në gjithë Shqipërinë. Ata dallohen gjithashtu për kulinarinë e veçantë

Edhe pse kanë rreth 157 vjet që jetojnë në Shqipëri ata kanë arritur të ruajnë gjuhën, traditat dhe zakonet e vendit nga erdhën.

Marre nga faqja zyrtare Komiteti për Pakicat Kombëtare