Kryetari i bashkisë së Kukësit, Safet Gjici ka zhvilluar një takim në fshatin Mamëz.

Duke folur me banorët e fshatit Mamëz, Gjici tha se, ne vijmë me kokën lart për të gjithë punët e mira që kemi bërë gjatë mandatit të parë.

“Në 2019 premtuam rrugën e Kolshit, ku sot është një fjalë e mbajtur. Njëjtë si rrugën e Kolshit do të bëjmë rrugën e Mamëzit e të gjithë njësitë e tjera, të cilat janë pjesë e kontratës që ne e lidhim bashkërisht më 14 maj”, tha ai.

Ne vijim, Gjici tha se, “ne do të vazhdojmë të investojmë për Kukësin, ashtu siç bëmë aeroportin, spitalin, lagjet 4,5 dhe 6. Bëmë investime në rrugën e turizmit, bëmë investime tek lagjja e re. Bëmë investime në rrugën “Rilindja”. Bëmë investime në çerdhe, kopshte shkolla. Bëmë investime në dy pallate ku strehuam 70 familje, që sot i kanë marrë shtëpitë falas.

“I kemi kushtuar vëmendje strehimit social, kemi dhe 400 familje për të strehuar. Nuk do të lëmë familje që është në territor të Kukësit ata që janë jetim apo invalidë pa strehuar”, tha ai.

Po ashtu, Gjici, tha se, janë dy rrugë që i kemi kaluar në këshillin bashkiak që do të realizojmë. Këtë vit do të përfundojë rruga Manëz dhe Surrojit.

“Do të nisim investimet në ujësjellës një investim me qeverinë dhe bashkinë Kukës në 14 njësit e bashkisë.Të bashkohemi të majtë të djathtë që të bëjmë më shumë punë më shumë investime për Kukësin”, tha Gjici.