Kandidati i koalicionit “Bashkë Fitojmë” për bashkinë e Elbasanit, Luçiano Boçi tha se nëse do fitojë zgjedhjet do të mbyllte inceneratorin e Elbasanit.

I ftuar në një studio televizive, Boçi tha se “do të krijonte një landfill që do menaxhonte plehrat vetëm të bashkisë, jo të qarkut”.

“Do e mbyllja inceneratorin, do e kaloja në shkallët ligjore, vendimi i përket Këshillit Bashkiak, por vendimi kryesor i takon qytetarëve. Si mund të dalim nga kjo? Pse duhet ta bëjë Elbasani që të grumbullojë të gjitha mbeturinat e qarkut? 70 mijë tonë plehra ka Elbasani, të bëhet një landfill me një kosto 2 milionë euro, t’i grumbullojë në modelin e landfillit të Bushatit”, tha Boçi.

Boçi u ndal edhe te deklaratat e kryeministrit Rama nga Elbasani, lidhur me programin e paraqitur prej tij.

“Përmendi 400 milionë. E ka kompleks nga inceneratorët, kurrë në ligjërimin tim politik nuk kam përmendur që paska një investitor që do të sjellë 400 milionë. Personi në fjalë është përfaqësues i Feder Company, nënshkrimi ynë ka të bërë me krijimin e një marke të mbrojur “Made in Elbasan”, si vaji i ullirit. Nuk është investitor, është gënjeshtër e madhe, është përfaqësues i një kompanie ndërkombëtare, është një marrëveshje paraprake. Nëse ka projekte për bashkitë, mënyrat janë të ndryshme, nga BERZH, Banka Europiane apo garanci sovrane. Cilësia shihet te impakti social dhe ekonomik”, theksoi ai.

Boçi tha se nuk është as kandidat i Ilir Metës dhe as i Sali Berishës. Ai tha se koalicioni me Partinë e Lirisë, erdhi si pasojë e rrethanave.

“Unë jam përfaqësues i opozitës dhe opozita janë njerëzit fillimisht, s’mund të më thuash që jam përfaqësues i dikujt apo i dikujt tjetër, unë jam përfaqësues i Elbasanit, unë zbrita katet e larta të politikës. Rrethanat politike përcaktojnë opozitën”, tha Boçi. /ATSH